Endlich wieder Dihei!

Es isch doch immer wieder schön, hei zcho. Obwohl, wommer im Flüger ghogget sind, simmer nöd sicher gsi, öb d'Ruth und dä Peter au mithei chönd...

Mir hend s'letscht Mol d'Kofferä packt und sind mit üsem Auto an Flughafä gfahrä, mir hend d'Ruth und d'Nicole mit äm Gepäck zum Iitschäggä gschickt und hend s'Auto abgäh ohni Problem (1527,4 Meilä simmer gfahrä ). Wommer zrugg chömet zum Iitschäggä hend mer zerscht no müesä go Übergwicht zahlä! S'erscht Mol! Und dänn no wiä viel! Dörf da gar nöd sägä (aber wäret öppä än Whisky gsi...).

D'Azeigetaflä hett üs nochem churzä Abstecher in Duty-Free-Shopping gseit, dass dä Flugi Delayed 11:30 segi. Mir sind denn go eis Trinkä wobi d'Taflä eigentlich immer s'Gliich azeigt hett. Am 11:25 sind d'Ruth und dä Peter vorus gangä und mir sind denn hinädri do isch s'Boarding scho lang am laufä gsi. I dä Ahnahm, dass d'Ruth und dä Peter scho im Flugi sind hemmer grad ächli prassiert. Womer im Flugi gsi sind und d'Plätz vo dänä zwei no läär gsi sind, hemmer komisch glueget und wo diä vom Personal gseit hett, dass mer nümä chönd wartä simmer grad ächli is Schwiizä cho... Zum Glück hett gli druff abä dä Chopf vom Peter dur Türä glueget und mir hend chönä ufschnuuffä...

Mit 15 Minutä verspötig simmer in Chlotä acho wommer denn mit em Zug hei gfahrä sind...

Eifach schön gsi sind üsi Feriä und mir hends richtig gnossä, diä super usgwähltä Underkünft und Sehenswürdikeitä go aluegä wo dä Peter für üs so genial vorbereitet gha hett!

Dankä Peter fürs organisierä! Isch würkli fantastisch gsi, wa du für üs usgsuecht hesch!

Dankä Ruth und Peter für üses Hochzigsgschänk! Mir werdet das niä vergässä! Da isch i üsnä Chöpf

Damit mir morn Morgä gnuäg früäh am Flughafä sind, simmer hüt id Nöchi gfahrä wommer üsi letschti Nacht imenä Farmhuus. D'Fahrt dött anä isch schön aber nöd speziell gsi, s'hett praktisch immer gregnet. Oh doch, ufemen Felsä im Wasser hemmer no äs paar Robbä gseh gha. Das isch eigentlich s'Highlight vo därä Fahrt gsi .

S'Farmhouse hemmer nöd grad gfundä gha, aber mit Hilf vo dä Louise per Telefon simmer doch no acho. Am Obig gömmer no under d'Iisäbahnbrugg go ässä und Morn müemer scho Abschied näh vo Schottland ...

Nochem Zmorgä im Lighthouse simmer mit em Auto losgfahrä und hend d'Ruth und dä Peter in Portpatrick abgladä und sin wiiter as Mull of Galloway. Das isch dä südlichscht Punkt vo Schottland. Mir hend nochli umänand glueget und sind no uf dä Lüchtturm ufägstiegä 134 Stägä- und Leitärä-Tritt. Isch beiidruckend gsi, d'Wiiti wommer gseh hend.

Aschlüüssend simmer uf Portpatrick hend no öppis gässä, wo d'Ruth aglüte hett, dass sie gar kein Bus id Nöchi vo üsem Lighthouse hend. So simmer denn uf Stranraer gfahrä und hend denn es zweit Mol Taxi gspielt für dä Tag .

Hüt hememer no di letscht Nacht i dä Lighthouse Suite bevor mer denn wieder Richtig Edinburgh fahret...

D'Koffer hemmer wieder zämäpackt und is Auto verladä. Üses hütig Etappäziel isch s'Coesewall Lighthouse wommer dä zweit Teil vo üsem Hochzigsgschänk törfät entgägä näh.

Ufem Weg simmer no Drumlanrig Castle go aluegä. D'Tour dur das Gebäude isch sehr interessant gsi und s'hett Bilder und Möbel gha, wo Mengs Museum froh drüber wär. Gschichtlich hemmer no paar Sachä meh erfahrä und wüsset jetzt au wieso dä Bonnie Prince Charles hett wöllä di Schottisch Chronä eroberä...

Jetzt simmer bim Lighthouse acho und hend üsi Suite bezogä. Mir hoffet immer no uf ächli rüchers Wetter, dass mer au gsehnd, wiä Wild s'Meer do cha si...

Gruselgschichtä, Underground und Musig.

Edinburgh-Dungeon isch üs vo dä Börni und äm Michi empfohlä wordä, drum hemmer das grad am Afang vo däm Tag gmacht. Wommer gwartet hend hett üs diä Dunkelheit scho grad ächli Angscht gmacht und mir hend üs immer guet umäglueget, wommer umen Eggä gloffä sind. Mir hend s'Gfühl gha, dass diä Schauspieler üs immer verschreckä wönd. Das hett sich als unwohr usägstellt und mir sind dur das Dungeon durä und sind nur zwei Mol richtig verschrockä. S'isch guet gmacht gsi, aber mir hend äs bitz meh erwartet gha.

Als nögschts (nochem obligatorischä Kafi im Starbucks ) simmer anä wiiteri Füehrig gangä, wo üs id Mary King's Close gführt hett. Das isch di alti Stadt, wo underm hütigä Edinburgh immer no bestoht. Im 18 Jahrhundert hett mer eifach uf dä altä Stadt druff di neui Stadt errichtet und hüt chammer no abä und gseht, i was für Hüsär diä Lüt ano dazumal glebt hend. Isch no beeidruckend gsi und Gschichtä dezue sind interessant gsi.

Noch dänä zwei Tourä simmer is Hotel zrugg gangä, wommer üs für dä Höhepunkt vo üserä Schottlandreis parad gmacht hend: fürs Military-Tattoo. Nochemen feinä Znacht simmer denn mit dä Massä i das Stadion iägloffä. Mir hend eigentlich gmeint gha mir hend Sitz ganz vornä, aber sind Schlussendlich ganz hinä gsi. Das hett diä Show aber keis Bitz schlechter gmacht (ussert dä digg Maa näbäd dä Nicole ). Mir hend wäret fascht zwei Stund äs gigantischs Spektakel törfä bewunderä. Dankä Ruth und Peter für das Hochzigsgschenk!

Edinburgh isch ä riesigi Stadt!

Hüt simmer zerscht id Stadt gfahrä und sind inän Seightseeing-Bus iigstiigä. Alli Sehenswürdikeitä hemmer im Schnelldurchgang aglueget und hend en erschtä (zweitä, noch gescht Obig) Iidruck übercho. Was eim halt grad sofort is Aug stosst isch s'Edinburgh-Castle. Das isch es au gsi, wa d'Nicole und ich aschlüüssend go aluegä sind.

Üs hett das sehr guet gfallä, mir hend än dütschä Audioguide kauft und hend a allnä Eggä uf Dütsch erfahrä, was do grad alles gloffä isch. Bsunders beeindruckend isch diä Schottisch Chronä, dä Zepter und s'Schwert gsi! Diä uraltä und gschichtsträchtigä Relikt nur ä Schiibädicki entfernt...

Zwei Stund hemmer üs verwiilt i däm Schloss. Nochene simmer no äs bitz dur d'Strossä gloffä wos unzähligi Lüüt gha hett wo eim versuchet hend irgend ä Show aztrüllä und no meh hetts verruckti Lüüt gha... Edinburgh isch glaub ä Stadt, wo sich diä komischä Lüüt träffät

Am Obig simmer denn z'Fuess an Port Leith gloffä wommer imenä ganz herzigä Reschtaurand mega guet gessä hend. Han äm Peter sis Steak scho ächli vergönnt, diä Sauce hett sehr fein usgseh.

S'nöchschti Ziel isch Edinburgh. S'Wetter isch leider nöd grad s'bescht, drum beschlüsset mir, relativ direkt z'fahrä. Zerscht gömmer aber no gschnell id Shortbread-Factory. Leider chamer dött kei Füehrig machä drum cheret mir grad wieder um (mit em Umweg über s'Hotel, dä Peter hett sin Huet vergässä ).

Ufem Weg noch Edinburgh machet mir en Stop bim Scone Palace. Da isch dä Palascht, wo amigs di Schottischä Königä krönt wordä sind. Dött isch au dä Stone of Scone, wo dä Schottä anschiinend immer Glück brocht hett. S'Original isch in Edinburgh, wos aber au nöd sicher sind, öb er s'Original isch...

S'Hotel in Edinburgh findet mir uf Anhieb und am Obig sind mer scho s'Erscht mol id Stadt gfahrä go ässä und go komischi Lüt aluege...

Wiischopf-Adler. So einä hemmer hüt ufem Arm gha. Und zwor simmer im Huntly Falconry Center gsi. Dä John hett üs am Elfi drü Raubvögel zeiget, wommer selber hend chönä ufem Arm ha. Zerscht hett er üs än Kauz, Habbicht und ä Schnee-Ülä zeigät. D'Schneeülä und dä Habbicht hend üs fescht a üsi Chatzä erinneret: d'Schneeülä hett sich a d'Hand gschmeiget, wenn mer si gstreichlet hett und dä Habbicht hett wiä dä Mike noch Ässa bettlet. Dä John hett gmeint gha, dass i ca. 40 Minutä di nögschtä drü Vögel dra chämet. Mir hend gfröget, öb dä Bald-Eagle au debi segi und er hett da bestätigt.

Drum simmer denn bliibä und hend üs bimene Tee d'Ziit vertriebä. S'wartä hett sich glohnt! Obwohls underdessä agfangä hett Regnä isch dä Weisschopf-Adler uusgflogä. Jedä wo wöllä hett, hett dörfä dä Händschä alegge und sobald dä John s'Ässä zeigt hett isch das grossi Tiir losgflogä und isch ufem Arm glandet. Nöd nur d'Nicole hett Müäh gha das 4,2 Kilo schweri Gschöpf länger ufem Arm zhebä und bim Abflug hetts grad echli än Rückstoss ghä. Noch dem Adler hett üs dä John no än Falkä und än Uhu zeiget.

Wiiter simmer uf Dufftown gfahrä, därä Whisky-Stadt und äm Heimatort vo dä Glenfiddich Distellery. Mir hend ä (gratis) Tour gmacht wo üs no meh zeiget hett, als bi dä letschtä zwei Tourä. Isch no Interessant gsi, direkt am Fass z'schmöckä, wiä dä Whisky isch! Natürli hetts dä obligatorisch Probierär au gäh. Im Restaurant hemmer üs no gstärcht, bevor mer wieder zruck is Hotel sind zum diä schönä Zimmer zgnüssä...

Üsäs hüttigi Ziel isch Aboyden gsi. Mir sind zu dä 140.schtä Highland-Games gfahrä. Mir hend fascht dä ganz Tag dött verbrocht, wo starchi Mannä Baumstämm, Hämmer und Gwicht umäwärfed, wo Meitli und Buebä Schwerter-Tänz vollfüehret und Pipes and Drums Corps ufträttät. Än wunderschönä sunnigä Tag isch das gsi!

Nessi wo bisch

Hüt hemmer üsi Koffer wieder packt und sind losgfahrä. Damol hemmer nöd ä Fährä gno umd vo därä Inslä z'cho, sondern sind über d'Skye-Bridge gfahrä, wo's erscht siit ca. 10 Johr git.

Gli nochher sind mer as Eilean Donan Castle gfahrä, das isch anschiinend s'meischtfotografiert Schloss/Burg vo dä ganzä Welt. Natürli hend au mir äs paar Fotene gmacht . Wiä au vom Urquart Castle ämene wiitere Schloss, wo aber scho meh verfallä isch. Das Schloss stoht am Loch Ness. Genau, dött wo siit ca. 75 Johr unentwegt noch em Nessi gsuecht wird. Über 1000 Lüüt behauptet, dass sie s'Nessi gseh heget. Im Loch Ness Center hemmer gseh, dass viel vo dä Bilder gfälscht sind, aber dass s'eint oder ander scho chönnti echt si... Mit hend agschtrengt uf s'Loch usä glueget, aber s'Nessi hett sich üs au nöd wöllä zeigä

So simmer denn wiiter gfahrä und über Inverness uf Nairn gfahrä, wommer imene Pub z'Mittag gessä hend und no ä Rundi Dog gspielt hend. Und denn hemmer di reschlichä Meilä under d'Räder gnoh und sind uf Huntly gfahrä, wommer im Huntly Castle üsi Underkunft für di nögschtä drü Nächt hend. Das Hotel isch dä Hammer! Im altä Schloss hend d'Bsitzer mit viel Liäbi ä wunderschöns Hotel gmacht. S'Essä isch super gsi und nochher a dä Bar hemmer üs nomol bimänä Dog-Spiel und ämänä Whisky chönä verwiilä.
Dä Bsitzer isch denn no zu üs anä ghogget, würkli luschtig, was dä für Gschichä verzellt hett

Hüt simmer am Morgä go Portree aluegä. Mir hend (fascht) jedä Shop aglueget und d'Nicole hett sogar öppis gfundä: Mit hend jetzt herzigi Schöf und geili Chatzämagnet...

Am Nomitag simmer denn zu dä einzigä Whisky-Distellery uf dä Isle of Skye gfahrä: Talisker. Mit hend dött wieder e Füehrig buechet und grad am Afang scho än Tester übercho. Diä Distellery isch eifach viel grösser gsi, als die uf dä Isle of Arran, het ä anderi Methodä zum d'Gerschtä tröchnä, aber susch isch si genau glich gsi...

Nach därä Tour simmer inä herzigs Beizli go ä Stärchig neh, bevor mer denn zum Talisker-Huus gfahrä sind und id Talisker-Bay gloffä sind. Isch än wunderschönä Strand gsi und dä Peter hett das so greizt, dass er grad i das ca. 15° C chalt Wasser isch. Mir hend schön blöd glueget gha

Znacht hemmer im Sea Breeze Reschtaurand gässs, ämä ganz herzigä Beizli mit Seesicht. Fein isch es gsi und nöd eso gschtürmig wiä geschter, eifach gmüetlich. Nochem abschlüssendä Whisky i dä Hotelbar sind mer denn au scho Riif fürs Bett...

Hüt simmer äs Schloss go aluege. Und nöd eifach nur irgend es Schloss. Dä Huusherr isch dä 30. Lord of MacLeod from MacLeod. S'Schloss isch s'berüemti Schloss Dunvegan Castle go aluegä. Leider wohnet diä immer no dinä, drum chammer nur en chlinä Teil go aluegä. Mir hend trotzdem än chlinä Iidruck öbercho und s'Verliess hett üs grad ächli gschauderet.

S'nögscht Ziit isch s'Neist Point Lighthouse gsi. Ufem Wäg zum Lüchtturm simmer no bim Silberschmuckladä verbii und üsi Frauä hend no beidi ä schöns Chettäli mit Ahänger übercho. Vorem Lüchtturm hemmer üs no gstärcht und sind denn ca. drissg Minutä zum Lüchtturm gloffä. D'Ussicht isch wunderschön und trotz dä Meeräsbiisä hemmer üs ächli verwiilät.

Am Obig hemmer wöllä go üsäs 1.Auguscht Essä go nä im Harbour View. Leider sind äs paar Missverständnis uftaucht, und so hemmer denn nöd am gliichä Tisch chönä ässä. Aber das hett üs d'Stimmig nöd verdorbä...

Noch eim oder zwei Whisky simmer denn au is Bett gangä...

Hüt hemmer wieder üsi Koffer zämä packt und sind los richtig Isle of Skye. Hüt hett sich dä Peter hinder s'Schtüür gsetzt. Mir sind über d'Bergä von Glencoe gfahrä wommer wunderschöni Ussichtä hend chönä gnüssä. Ufemene Parkplatz hett sich für äs paar Pfund sogar än Dudelsackblöser d'Müäh gnoh und no äs Ständli gspillt.

Natürli hemmer au bim Glennfinnan Viadukt aghaltä wo dä Hogwart Express au scho durä gfahrä isch. Wo d'Nicole s'Foti gmacht hett isch denn grad au än Zug über s'Viadukt gfahrä. Guets Timing!

Mit Glück hemmer no d'15:05 Fährä in Mallaig chönä nä. Eigentlich isch sie vollä gsi, aber dur das nöd alli so viel Platz bruch hend simmer als zweitletschts Auto no uf d'Fährä cho. So simmer uf Armadale uf dä Isle of Skye cho.

D'Isle of Skye hett üs nöd so schön empfangä: Siit mer acho sind schiffets nur. Mir hend zwor viel schöni Sachä gseh uf dä Fahrt noch Portree, aber dur dä Rägä gseht das alles halt nur halb so schön us.

Mir sind direkt a üses Hotel anä gfahrä, dä Parkplatz isch zwor äs paar Schritt äwäg, aber d'Zimmer sind schön. Hüt obig gömer grad is Hotel-Reschtaurand. Und denn spielet mir villicht no äs Dog oder sueche üs äs Pub mit ärä Bar und emene Whisky...

Früäh ufstoh! Dä Wecker hett hüt am halbi achti gschellät. Mir hend ä grösseri Autoreis planet.

Mit äm Auto simmer am Loch Fyne entlang bis uf Portavadie gfahrä wommer üsi erscht Fährä gnoh hend => isch no speziell gsi, mir hend rückwärts müässä uf diä Fährä fahrä, und das isch mit dä langä Auto und uf dä falschä Siitä no ä Useforderig gsi! Dä Peter hett schö glachät, wo dä Maa mir gseit hett ich söll noch rechts länkä und ich han noch links gränklät . Äs hett uf därä Fährä nöd eso viel Auto gha, drum isch das no guet gangä.

In Tarbert acho simmer denn direkt zu dä nögschtä Fährä gfahrä, uf Clanoaig. Leider hemmer diä Fährä um 15 minutä verpasst, drum hemmer ä Stund müässä wartä. D'Ruth, dä Peter und ich sind ufen Hügel uägstiigä und hend d'Ussicht gnossä währenddem d'Nicole im Auto bliibä isch und gläsä/gschlofä hett. D'Fährä und d'Isle of Arran isch meh bsetzt gsi und mir hend s'Auto gnäuer müässä parkierä. Zum Glück hemmer chönä fürschi iä fahrä, denn isch üs das mit Bravour glungä.

Uf dä Isle of Arran simmer zerscht mol zu dä Distellery of Arran gangä, dä Scotland's Newest Malt Whisky Distillery. Mer sind churz vorerä Füehrig gsi, drum hemmer grad a därä teilgnoh. Isch no iidrücklich und am Schluss bim Degustierä au fein gsi. (Dä Peter hett dörfä dä Nicole und dä Ruth dä Whisky wägtrinkä ).

Noch däm Abstecher sind mer wiiter gfahrä, mer hend jo än Iidruck vo därä Inslä wöllä übercho. Üsä Wäg hett üs uf Brodick gfüert, wommer gern inäs Reschtaurand wärät öppis chlisäs go ässä. Leider hemmer nüt gfundä, do simmer spontan in Coop go Brot, Chäs und Fleisch poschtä und hend am Strand äs Picknick gmacht. Isch Fein gsi

Um d'5i Fährä zverwütschä hemmer denn d'Abchürzig über dä Hügäl gnoh und sind für hüt zum drittä und letschtä Mol ufä Fährä gangä. Über dä Landwäg simmer denn uf Inveraray gfahrä wommer imänä herzigä Reschtaurand z'Nacht gessä hend. Isch no Iidrücklich gsi, wiä leer das Ort am Obig isch...

Jetzt simmer wieder im B&B und hend diä letscht Nacht i däm Huus vor üs, bevors Morn wiiter uf d'Isle of Skye goht. Freu mich jetzt scho...

Üsä erscht Morgä fangt mitemene richtigä Schottischä Zmorgä a: Egg, Bacon und Sausage mit ämänä Black Tea.
Guät gstärcht gömmer uf üsen erschtä Usflug. Mir fahret mit äm Auto noch Inveraray. Mir pakierät s'Auto und laufet grad dur ä wunderschöns Strössli. D'Nicole hett sich grad i diä Kulissä verliebt.

Im Jail erwartet üs ä interessanti Umgebig. Mir gsehnd, wiä d'Mensch im 17. Johrhundert im Gfängnis hend müessä läbä. Am Afang i ungheiztä Löcher und spöter denn i gheiztä Zellä. Noch dem Iidrücklichä Bsuech laufet mir es bitz dur Inveraray und versuechet dä zwüschätdurä ufträtändä Rägägüss usem Weg z'goh. Dä Peter chauft drum zwei Schirm wo üs gueti Dienscht leischtät.

Isch no komisch do: Vo Sunnäschii zu Rägä gohts innert Minutä mir hend hüt sicher füf mol Rägä gha und nochene wieder schön...
Nochere Stärchig imänä Kafi simmer denn zum Inveraray Castle. Äs wunderschöns Schloss wo hüt no Nochfahrä vom Ursprünglichä Familiä drinn läbt, dä Campbell Familiä.

Jetzt simmer dihei, ruebet üs us bevor mer go ässä gönd. => Jo, mir hend geschter äs Reschtaurand gfundä und hüt gömmer sogar inäs anders.

Hüt sind mer losgreist. Am Morgä isch üs dä Papi z'Bischofszell go abholä cho. Nochere Stund Fahrt simmer in Chlotä acho. Nochemene Kafi/Espresso/HeissäSchoggi simmer dur dä Zoll und nochere 2ähalb Flugziit simmer in Edinburgh acho. Alles Gepäck isch acho (Dankä Peter fürs iitschäggä und scho simmer ufem Wäg gsi üses Auto für di nögschtä zwei Wuchä abzholä.

Am Afang bin grad emol ich as Stüür ghoggät und dä Peter hett versuecht üs di richtigä Wäg azgäh. Er hett sich gäg sini erscht Idee entschiedä und hett üs über Glasgow glotst => direkt in erschtä Stau . Mer sind denn vo dä Autobahn und hend üs dä Weg dur d'Siitästrossä gsuecht. Mer sind guet gfahrä und in Balloch acho. Vo dä Sandra hemmer nämli dä Uftrag gha äs Päckli mit Blötterliwasser (Uusdruck vom Peter) zu dä Silvia z'bringä, änere Fründin vo irä. D'Silvia hett denn au komisch glueget, wommer sie mit em Namä begrüesst hend und hett sich mega gfreut ab em Rivella blau Dä Peter hett gmeint, mer nämmet denn s'nögscht Mol zwei vo dänä Blötterliwasser mit

Nochere wiiter Fahrt simmer in St.Catherine i üsem erschtä B&B äm Thistle House acho. Jetzt gnüsset mir grad d'Rueh, bevor mer üs uf dä Wäg machet, äs Reschtorand für üsä erschti Znacht z'suechä. Und so wiä mer das Örtli bis jetzt gseh hend müemmer würkli suechä...